ආණ්ඩුවට පණිවිඩයක්..

ආණ්ඩුවට පණිවිඩයක්..
පාස්කු ප්‍රහාරය ගැන ජනාධිපති පරීක්ෂණ කොමිසමක් තිබුණා. පරීක්ෂණ වාර්තාව පහුගිය ආණ්ඩුවේ විෂය භාර ඇමතිට ලබා දී තිබුණා. ඇමති එහි පිටපතක් කතෝලික සභාවට ලබා දුන්නා. ඒත් ඒ වාර්තාව ඇමතිවත්, කතෝලික සභාවවත් රටට ප්‍රකාශ කළේ නෑ. ජනතාව දන්නේ එක දෙයයි. ඒ වාර්තාවේ වෙලුම් කිහිපයක් අඩුබව පමණයි.
අලුත් රජය ජනතාවට පොරොන්දුවක් දුන්නා. පාස්කු ප්‍රහාරය ගැන පරීක්ෂණ කඩිනම් කරනවා කියලා. දැන් අලුත් වටයකින් පරීක්ෂණ ආරම්භ කරලා. 2025 අප්‍රේල් 21 වනවිට ප්‍රහාරය සිදුකර අවුරුදු 6ක් සම්පූර්ණ වෙනවා. ඉන් අවුරුදු 5ක්ම ගෙවුණේ ගෝටාභය, රනිල්-රාජපක්ෂ ආණ්ඩුව යටතේ.
නමුත් වත්මන් රජයට කිසිවිටෙකත් එසේ කල් මැරිය නොහැකිය, පරීක්ෂණය යටගැසිය නොහැකිය, අපරාදකරුවන්ට ආරක්ෂාව සැලසිය නොහැකිය, නීතිය නැමිය නොහැකිය. ඔවුන්ගේ අත්වල පාස්කුවේ ලේ නැත.
ජනාධිපති අනුර කුමාර සහෝදරයා ඇතුළු ජාතික ජන බලවේගය ආණ්ඩුවට ජනතාව මෙතරම් ජනවරමක් ලබා දුන්නේ එතෙක් බලයේ සිටි සෑම පාලකයකුගේම අත්වල ලේ නිසාය. ඒ නිසා, පාස්කු ප්‍රහාරය ඇතුලු සියලුම අපරාධ, මනුෂ්‍ය ඝාතන සහ අතුරුදහන් කිරීම් ගැන සත්‍ය හෙළිකර, යුක්තිය ඉටු කරීමේ අභියෝගය ජය ගන්නා ප්‍රමාණය අනුව නව දේශපාලන වෙනස, ඒ පිළිබද විශ්වාසය සහ නව රජයේ ඉදිරිය ගැනත් ජනතාව සිතා බලාවි.